((( ကွက်လပ်ပိုများကို ဖြည့်စွက်ခြင်း )))
((( ကွက်လပ်ပိုများကို ဖြည့်စွက်ခြင်း )))
လူ ၁၀ ယောက် ဝိုင်းထိုင်ပြောနေတဲ့ လူအုပ်ထဲကို
"ကိုယ်မေကိုယ်လိုး" လို့ လှမ်းအော်ဆဲလိုက်တယ်
လူ ၁၀ ယောက်လုံးက ချက်ချင်း ပြိုင်တူ တုံ့ပြန်တယ်
"ဟေ့ရောင်.. မင်း- ဘာ-စောက်-စကားပြောတာလဲ" တဲ့
ထိုးမယ် ကြိတ်မယ် သတ်မယ် ဖြတ်မယ် တကဲကဲနဲ့
ကျနော် ဆဲတာ သူ တစ်ယောက်တည်းကိုပါဗျာ
ခင်ဗျားတို့ ၉ ယောက်နဲ့ ဘာမှ မဆိုင်ဘူးလေ
နားတွေဟာ ဘာကို ကြားရလိမ့်မယ်လို့ မသိရသလို
လူတွေဟာ နားကို ဘာနဲ့ ပိတ်ထားရမလဲ မသိကြဘူး
ကျနော့ဖက်ကတော့ ရည်ရွယ်ပြီး မစော်ကားပေမဲ့
ခင်ဗျားတို့ဖက်မှာ စော်ကားခံရသလို ဖြစ်နေတယ်
ဒီဖြစ်ရပ်ကို ဘယ်လို ဥပဒေနဲ့ ကိုင်တွယ်ကြမလဲ
ကျနော်မှ မအော်ဆဲရင် သူ မကြားဖူး ဖြစ်နေတယ်
၁ ဦးကို ဆဲဖို့ ၉ ဦးကို ဘေးဖယ်ခိုင်းလို့ သင့်ပါ့မလား
ဒါတော့- ကျနော် မတရားဘူးလို့ ခင်ဗျားတို့ မြင်ကြရင်
ဒါလည်း- ကျနော် မမှားဘူးလို့ ခင်ဗျားတို့ မြင်နိုင်မလား
တံခါးမရှိတဲ့ လှောင်အိမ်ထဲကို လေပြေတွေ ဝင်လာတာ
လှောင်အိမ်ထဲနေတဲ့ ကျနော်တို့ဟာ တားဆီးလို့ မရဘူး
နံရံမရှိတဲ့ အခန်းငယ်ထဲကို နေရောင်တွေ ဝင်လာတာ
အခန်းငယ်ထဲနေတဲ့ ကျနော်တို့ဟာ ပိတ်ပင်လို့ မရဘူး
ဒီမှာ စာဖတ်ဖို့ ကျနော် ဖွင့်ထားတဲ့ လေးပေမီးချောင်းဟာ
ဘေးမှာ အိပ်နေတဲ့ ခင်ဗျားမျက်လုံးပေါ်မှာ လင်းနေတယ်
မျက်လုံးကို ခင်ဗျား ကမ္ဘာထဲက နှိုက်ထုတ်သွားလို့ မရဘူး
မီးချောင်းကို ကျနော် ကမ္ဘာထဲက ဖြုတ်ထုတ်သွားလို့ မရဘူး
ဆူးခင်းပြင်ပေါ်မှာ မြွေ အရေခွံ အသစ်လဲရင်း ခွေနေစဉ်
ဆူးတွေဟာ ဆက် ရှည်ထွက်နေတဲ့ အခြေအနေတိုင်းမှာ
တစ်ဖက်က ဘဝလိုအပ်ချက်တိုင်းကို ဆွဲထူရင်းနဲ့ ရှေ့ဆက်
ကွက်လပ် အပို ထပ်ထည့်ခိုင်းသလို တွဲကူခြင်းနဲ့ ဖြည့်စွက်
နေသာ လေသာတဲ့ နန်းတော်ထဲဝင်လည်း ခရီးအတူမို့
မရေရာ မသေချာတဲ့ လမ်းပေါ်လဲရင်လည်း မငြီးမငြူ ဖို့
ခင်ဗျားနဲ့ကျနော်နဲ့ အတူလျှောက်မှ ကျနော်တို့ ရောက်မှာ
၁၀ ယောက်စလုံးကို ဆဲမိသွားတာကို လက်ခံနိုင်ပေမဲ့
၁၀ ခေါက်စလုံး ဆဲနေတာကိုတော့ လက်ခံနိုင်ပေဘူး
ကိုယ့်ခေါင်း ဂေါက်ဖူးရင် သူများခေါင်း မဖောက်စားသင့်
အရူးအကြောင်း ဖြစ်တည်မှု ခေါင်းစဉ်ချည်း တပ်မနေကြနဲ့
ပူပေါင်း ချစ်ကြည်ပြု အကောင်းမြင်ပြီး မျှဝေရမဲ့ ဝဋ်ကြွေး
ကိုယ်စီ အပြန်အလှန် ခွံ့ကျွေးစောင့်ရှောက်ရမဲ့ အဆိပ်ရိက္ခာ
ကျနော်တို့ကမ္ဘာ၏ ရိတ်သိမ်းခြင်းရော၊ စိုက်ပျိုးခြင်းပါ ပါဝင်တဲ့
ဒီ- စိုက်ခင်းထဲတွင် အကြောင်းအကျိုးနဲ့ ဖြစ်ရပ်တွေရဲ့ ဓမ္မတရား
ဒီ- အမှိုက်ခြင်းထဲတွင် အဟောင်းအဆိုးနဲ့ ညစ်ပတ်နေတဲ့ အလှများ
သူများ မေးခွန်းတွေကို ကိုယ့်မေးခွန်းတွေလိုပဲ သဘောထား၍
ကွက်လပ်ဖြည့်စဉ်၊ အဖြေ မပြည့်အား၊ အချိန် စေ့သွားတယ်။ ။
သုအိုင်စံ
၁၈-၀၁-၂၀၁၅
Comments
Post a Comment